IMAGE SOURCE, EPA

Итальяндық археологтар Тосканадан ежелгі Рим дәуіріне тиесілі деп есептелетін әдемі сақталған 24 қола мүсін тапты.

Мүсіндер ел астанасы Римнен солтүстікке қарай 160 км (100 миль) жерде орналасқан Сиена провинциясындағы төбедегі Сан-Касчиано-де-Багни қаласындағы көне моншаның лайлы қирандыларының астынан табылған.

Гигиея, Аполлон және басқа да грек-рим құдайлары бейнеленген фигуралардың жасы шамамен 2300 жыл деп айтылады.

Бір сарапшының айтуынша, бұл табылған «тарихты қайта жаза алады».

Моншалардың астынан табылған мүсіндердің көпшілігі – шамамен 6000 қола, күміс және алтын монеталармен бірге – біздің дәуірімізге дейінгі 2-ші ғасыр мен біздің дәуіріміздің 1-ші ғасырларына жатады. Бұл дәуір этрускалық биліктен римдік билікке көшкен аймақ ретінде «ежелгі Тосканадағы ұлы өзгерістер» кезеңін белгіледі, деп хабарлады Италия мәдениет министрлігі.

Сиенадағы Шетелдіктерге арналған университеттің ассистенті, қазба жұмыстарын жүргізіп жатқан Якопо Таболли мүсіндер қандай да бір рәсім ретінде термальды суға батырылған деп болжайды. «Сіз суға бересіз, өйткені су сізге бірдеңе береді деп үміттенесіз», - деді ол.

Суда сақталған мүсіндер Сан-Касчианодағы жаңа мұражайда көрмеге қойылмас бұрын, жақын маңдағы Гроссетодағы қалпына келтіру зертханасына жеткізіледі.

Италияның мемлекеттік мұражайларының бас директоры Массимо Осанна бұл жаңалық Риас қоласынан кейінгі ең маңызды және «ежелгі Жерорта теңізі тарихындағы ең маңызды қола олжалардың бірі» екенін айтты. 1972 жылы табылған Риас қолалары ежелгі жауынгерлердің жұбын бейнелейді. Олар шамамен біздің дәуірімізге дейінгі 460-450 жылдарға жатады деп есептеледі.