Беделді халықаралық турнир – «Фарьер Арена Поло Кубогы» атты полодан Словакия чемпионаты аясында Қазақстан Елшілігі ұйымдастырған «Ұлы дала рәміздері» этнографиялық экспозициясы сәтті өтті. Көрме орнын таңдау кездейсоқ емес, өйткені ат полосы көшпелілердің ежелгі ойындарының бірі – «көкпардан» бастау алады, деп хабарлайды DKNews.kz.

Белгілі венгр мүсінші Габор Миклош Секе жасаған Еуропадағы ең үлкен 20 тонналық жүйрік ат мүсінінің етегіне қазақтың дәстүрлі киіз үйі орнатылды.

Киіз үйдің айналасындағы экспозицияда қазақтың ежелгі қолөнері – жылқы шаруашылығы мен мал шаруашылығы, киіз үй жасау шеберлігі, домбыра тарту өнері туралы ақпараттық стендтер қойылған.

Осыдан бес мың жылдан астам уақыт бұрын Қазақстан аумағында жабайы жылқылар алғаш қолға үйретілгені, жылқы шаруашылығы қазақ халқының тұрмыс-тіршілігіне, материалдық және рухани мәдениетіне орасан зор ықпал еткені атап өтіледі.

Көрмеге келген словакиялықтар көшпенділердің адамзат тарихында металды балқытуды, арба дөңгелегін, садақ пен жебе жасауды бірінші болып үйренгенін білді. Көшпелілердің ең үлкен жаңалықтарының бірі – киіз үйді ойлап табу көшпелілерге Еуразияның кең-байтақ кеңістігін – Алтай сілемінен Жерорта теңізі жағалауына дейінгі аумақтарды игеруге мүмкіндік бергені атап өтіледі.

Көрме қонақтары ЮНЕСКО-ның дүниежүзілік материалдық емес мәдени мұралар тізіміне енген киіз үйдің тарихымен, оның безендірілуімен және ерекше шеберлігімен танысты. Киіз үйдің іші кілемдер мен былғары паннолармен, ұлттық киімдермен, көшпенділердің сауыт-саймандарымен және музыкалық аспаптармен безендірілді. Жеке стенд Қазақстанның табиғи рәміздері – Алатау бөктерінде алғаш рет өсірілген алма мен қызғалдақ гүліне арналған.

Экспозицияның орталық орны Қыпшақ даласының даңқты ұлы, ортағасырлық Египет пен Сирияның ұлы билеушісі Сұлтан аз-Захир Бейбарыстың 800 жылдығына арналған. Оның 13 ғасырдағы Кіші Азия мен Солтүстік Африканың кең байтақ аймағының бейнесін қалыптастырған көрнекті әскери және саяси жетістіктері атап өтіледі.

Қазақстанда аталып өтілетін Ұлттық домбыра күніне орай жас домбырашы Әмина Маманованың, халық бишілері Умида Болатбек пен Даяна Цсурдың өнер көрсетулері, домбыраның қайталанбас тарихы туралы буклеттер мен қазақтың таңдамалы күйлері жинақталған дискілер таратылды. ұйымдастырылды.

Астана күніне арналған фотокөрме де Словакия жұртшылығының үлкен қызығушылығын тудырды. Фотосуреттерде ұсынылған «Бәйтерек», «Хан-Шатыр», «Мәңгілік Ел» салтанатты аркасы және көшпенділердің басқа да сәулеттік нышандары ежелгі дәстүрлер сабақтастығын және Ұлы дала көшпелілер өркениетінің ілгерілеуін көрсетеді.